Kitne Haseen din hua karte thhe wo, jab kabhi yaad aate hai aankhon se aanshu nikal aate hai aur dil se bas yahi aah nikal hai kaas main fir se bachcha ban jaau.
Mujhe aaj bhi yaad jab main pehli baar school gaya. wo din main kaise bhool sakta hu. Mere papa ji ne gaon ke hi ek school me mera dakhila nursery me kara diya. Main pehle din school gaya, main bilkul shant aise lag raha tha jaise mera us din maun vrat tha. Pehli baar itne saare bachcho ko ek sath dekh raha tha wo sabhi ek dusre ke sath khel rahe the aur aapas me baatein kar rahe thhe aur main iss tarah se apni activity dikha raha tha jaise kisi Cinema hall me main akela baitha hu aur movie chal rahi aur sirf us movie ko dekh raha tha sabhi aapas me mast thhe.
Abhi maine puri class ko achhe se dekha bhi na tha ki achanak meri najar school ki principal par gayi unke haath me ek danda (stick) thi jise dekh kar main aur bhi darr gaya. chunki mera admission ek din pehle hi mere papa ne kara diya tha aur aaj to mere papa bhi sath nahi thhe. main man hi man soch raha tha ki ab kya hoga. Main class me pehli line me beech me baitha tha, “Ashish tum aage aa jaao apna basta ( School Bag) lekar” , Madam ji ne kaha. Main ab mere bas me nahi tha aisa lag raha tha jaise kisi ne mujh par vasikaran mantra ka prayog kiya ho main na chahte huye bhi uth kar khada hua aur ladkhadate kadmo se aage ki orr badha, shayad uss samay mere dil ki dhadkane bhi kafi tezz ho gayi thi. Ab main class me sabse aage khada tha aur fir suru hua madam ji ka prashna prahaar.
Madam – naam kya hai tumhara?
Main – Ashish
Madam – Papa ka naam kya hai?
Main – Ji Shree < father name> (darte huye)
Madam – aur mummy ka naam?
Main – Smt. < mother name >
Madam ke haanth me stick (danda) dekhkar main darr raha tha aur man hi man soch raha tha na jaane kya hoga ab aage, kahi ye mujhe maar na pad jaaye kyunki maine isse pehle madam ko ek ladke ko maarte dekha tha magar meri soch galat thi, madam ji ne table ke neech haath dala aur 2 toffe nikal ke mere haath me de di. Ab main taktaki laga kar unki taraf dekh raha tha, mujhe to yakin nahi ho raha tha. Maine toffe lekar jeb me rakh li aur apni jagah aakar baith gaya. Fir thodi der baad mere papa aa mujhe ghar le jaane ke liye aur main apne papa ke sath ghar chala aaya.
0 Comments
कृपया प्रतिक्रिया दें (Feedback Please)